Выканкам Нацыянальнага алімпійскага камітэта Рэспублікі Беларусь пастанавіў часова прызнаць грамадскую арганізацыю "Беларуская федэрацыя шашак" у якасці адзінага спартыўнага аб'яднання на тэрыторыі краіны, якое займаецца развіццём шашак і ўпаўнаважана прадстаўляць наш від спорту ў адпаведным міжнародным спартыўным аб'яднанні, на перыяд да 31.12.2024. Пасведчанне НАК. Certificate NOC.

23 снежня 85-гадовы юбілей адзначае Мікалай Фёдаравіч Зайцаў - першы беларускі майстар спорту па шашачнай кампазіцыі (1960), шматразовы чэмпіён Беларусі. Зычым моцнага здароўя, доўгіх гадоў жыцця і новых творчых знаходак!

На сайце Прэзідэнцкага спартыўнага клуба апублікаваны спіс 349 стыпендыятаў на 2024 год, у ліку якіх і пяць шашыстаў.

З 15 па 17 снежня ў г.Баку (Азербайджан) адбыўся міжнародны турнір па шашках-100, прысвечаны 100-годдзю з дня нараджэння Гейдара Аліева. Беларусь прадстаўлялі 9 спартсменаў. Упэўненую перамогу атрымаў Аляксей Куніца, які апярэдзіў бліжэйшага праследавальніка на чатыры ачкі. Марыя Часнакова і Сцяпан Дарашэнка сталі лепшымі сярод жанчын і моладзі адпаведна. Віншуем! Выніковая табліца, фотагалерэя.

15 снежня 60-гадовы юбілей адзначае Віктар Шульга - вядомы шашачны кампазітар: прызёр чэмпіянату свету, міжнародны майстар, экс-кіраўнік камітэта па кампазіцыі Сусветнай федэрацыі шашак ФМЖД, а таксама чэмпіён свету па рашэнні пазіцый, спартыўны журналіст і суддзя. Зычым моцнага здароўя, новых творчых дасягненняў, любві і павагі родных і блізкіх! Артыкул Віталя Варушылы пра творчасць юбіляра.

З 4 па 9 снежня ў г.Санкт-Пецярбург (Расія) праходзілі традыцыйныя спаборніцтвы па шашках-64 "Мемарыял В.А.Сокава". Нашу краіну прадстаўлялі мінчане мгр Аляксей Куніца, мм Паліна Петрусёва, мм Марыя Часнакова, мф Яўгенія Швед і мм Аляксандра Спірына. У класічнай праграме Марыя Часнакова стала трэцяй у жаночым заліку, Яўгенія Швед - лепшай сярод юніёрак да 20 гадоў. У бліскавічнай праграме Марыя Часнокова і Яўгенія Швед перамаглі сярод жанчын і юніёрак да 20 гадоў адпаведна. Вынікі: класіка, бліц.

З 20 па 26 лістапада ў Рэспубліканскім цэнтры алімпійскай падрыхтоўкі (г.Мінск, вул.Маркса, 10) праходзіла першая ліга чэмпіянату Беларусі па шашках-64 (мужчыны, жанчыны). Сюжэт тэлеканала СТВ, рэгламент. Вынікі: мужчыны, жанчыны.

З 20 па 29 кастрычніка ў Аланіі (Турцыя) праходзіў моладзевы чэмпіянат свету па шашках-64. 21 кастрычніка адбылася бліскавічная праграма. Чэмпіёнамі свету сталі Аляксандра Спірына і Арцём Ціханаў. Серабро на рахунку Веранікі Целяўной, бронза - Уладзіслава Валюка і Івана Невара. У хуткай праграме, якая прайшла 22 кастрычніка, другое золата выйграла Аляксандра Спірына! Арцём Ціханаў, Вікторыя Нікалаева і Дар'я Нікіфарава сталі другімі, Паліна Петрусёва і Міхаіл Усціменка - трэцімі. Удала нашы спартсмены выступілі і ў класічнай праграме: чэмпіёнамі свету сталі Паліна Петрусёва, Дар'я Нікіфарава і Юлія Швед, Марыя Часнакова - сярэбраны прызёр, Уладзіслаў Валюк, Вікторыя Нікалаева і Ганна Забалотскіх - бронзавыя! Віншуем спартсменаў і іх трэнераў! Старонка чэмпіянату. Склад зборнай Беларусі далей.

З 20 па 26 кастрычніка ў Аланіі праходзіў этап Кубка свету па шашках-64 - міжнародныя спаборніцтвы "Турцыя-2023". Старонка турніру. Міжнародны гросмайстар Андрэй Валюк стаў сярэбраным прызёрам у бліскавічнай праграме і бронзавым у хуткай. Міжнародны майстар Марыя Часнакова заняла трэцяе месца ў жаночым заліку ў хуткай праграме. У бліскавічнай праграме па бразільскіх шашках бронзавым прызёрам сярод жанчын стала міжнародны гросмайстар Вікторыя Нікалаева. Віншуем!

З 6 па 8 кастрычніка ў Слоніме праходзіў ХХІІ рэспубліканскі юнацкі камандны турнір па шашках-64 "Юныя таленты", прысвечаны памяці Мікалая Якуты. Перамагла каманда Магілёва. Табліца, палажэнне, фотагалерэя.